મહારાષ્ટ્રમાં મુખ્યમંત્રીના નામ પર સસ્પેન્સ યથાવત, શપથ ગ્રહણની તારીખ નક્કી

મહારાષ્ટ્રમાં મુખ્યમંત્રીના નામ પર સસ્પેન્સ યથાવત છે તેવામાં શપથગ્રહણની તારીખ નક્કી થઈ ગઈ છે. મુંબઈના આઝાદ મેદાનમાં શપથ ગ્રહણનો કાર્યક્રમ યોજાશે. આ કાર્યક્રમ માટે તૈયારીઓ પણ થઈ શરૂ. ચાલી રહી છે. આજે મહાયુતિ આઝાદ મેદાનમાં જઈને તૈયારીઓનું નિરીક્ષણ કરશે.

મહારાષ્ટ્રમાં મુખ્યમંત્રીના નામ પર સસ્પેન્સ ચાલુ છે. મહાયુતિને પ્રચંડ બહુમતી મળ્યા બાદ પણ નવ દિવસથી મુખ્યમંત્રીના નામ પર મંથન ચાલી રહ્યું છે. દરમિયાન શપથ ગ્રહણની તૈયારીઓ ચાલી રહી છે. મુખ્યમંત્રીના નામ પર ભલે સ્ટેમ્પ ન લગાવવામાં આવ્યો હોય પરંતુ તારીખ અને સ્થળ નક્કી કરવામાં આવ્યું છે. મહારાષ્ટ્રમાં નવી સરકાર 5 ડિસેમ્બરે શપથ લેશે. આજે, મંગળવારે મહાયુતિના ઘટક પક્ષોના નેતાઓ શપથ ગ્રહણ સમારોહની તૈયારીઓની સમીક્ષા કરવા આઝાદ મેદાનમાં જશે.

મહારાષ્ટ્ર વિધાનસભાની ચૂંટણીના પરિણામો જાહેર થયા બાદ હજુ સુધી મુખ્યમંત્રીનું નામ નક્કી કરવામાં આવ્યું નથી. દરમિયાન ભાજપે એક મોટું પગલું ભરીને બે નિરીક્ષકોની નિમણૂક કરી છે. કેન્દ્રીયમંત્રી નિર્મલા સીતારમણ અને ગુજરાતના પૂર્વ મુખ્યમંત્રી વિજય રૂપાણીને ધારાસભ્ય દળના નેતાની પસંદગી માટે નિરીક્ષક બનાવવામાં આવ્યા છે. 4 ડિસેમ્બરે ભાજપ ધારાસભ્ય દળના નેતાના નામની જાહેરાત કરશે.

વિજય રૂપાણી આજે મુંબઈ જશે
નિરીક્ષક તરીકે નિયુક્ત થયા બાદ ભાજપના નેતા વિજય રૂપાણી આજે 3 ડિસેમ્બરે મુંબઈ પહોંચશે. જ્યારે, નિર્મલા સીતારમણ 4 ડિસેમ્બરે સવારે મુંબઈ પહોંચશે. આ પછી 4 ડિસેમ્બરે જ વિધાનસભાની ચેમ્બરમાં ભાજપના ધારાસભ્ય દળની બેઠક મળશે. આ બેઠકમાં ભાજપના ધારાસભ્ય દળના નેતાની પસંદગી કરવામાં આવશે. ભાજપના ધારાસભ્ય દળના નેતાની પસંદગી કર્યા બાદ મહાયુતિના નેતાઓ રાજભવન જશે અને સરકાર બનાવવાનો દાવો રજૂ કરશે.

મહારાષ્ટ્રમાં 5 ડિસેમ્બરે શપથગ્રહણ
મહાયુતિ સરકારનો શપથ ગ્રહણ સમારોહ 5 ડિસેમ્બરે મુંબઈના આઝાદ મેદાનમાં સાંજે 5 વાગ્યે યોજાશે. કહેવાય છે કે આ કાર્યક્રમમાં પીએમ મોદી પણ ભાગ લેશે. આ સિવાય બીજેપીના તમામ મોટા નેતાઓ અને એનડીએ શાસિત રાજ્યોના મુખ્યમંત્રીઓ પણ કાર્યક્રમમાં હાજરી આપે તેવી શક્યતા છે. મહાયુતિના ઘટક પક્ષોના નેતાઓ મંગળવારે આઝાદ મેદાનમાં જઈને તૈયારીઓની સમીક્ષા કરશે.

મહારાષ્ટ્ર વિધાનસભા ચૂંટણી પરિણામો
તમને જણાવી દઈએ કે મહારાષ્ટ્ર વિધાનસભા ચૂંટણીમાં ભાજપ 132 સીટો જીતીને સૌથી મોટી પાર્ટી બની છે. મહાગઠબંધનની વાત કરીએ તો ભારતીય જનતા પાર્ટીએ 132 બેઠકો, શિવસેનાએ 57 બેઠકો અને એનસીપીએ 41 બેઠકો જીતી હતી. જ્યારે મહાવિકાસ અઘાડીમાં શિવસેના (યુબીટી)એ 20 બેઠકો, કોંગ્રેસને 16 અને એનસીપી (શરદ પવાર)ને 10 બેઠકો મળી હતી.