ઓડિશામાં ભારે વરસાદના કારણે વિકટ પરિસ્થિતિ, 24 કલાક ભારે વરસાદની આગાહી

ભદ્રક, કેન્દ્રપાડા અને જાજપુર જિલ્લાના અનેક વિસ્તારો પાણીમાં ગરકાવ.

ઓડિશાના ભુવનેશ્વરમાં મુશળધાર વરસાદને કારણે નદીઓના જળસ્તરમાં સતત વધારો થઈ રહ્યો છે. અનેક જિલ્લાઓના નીચાણવાળા વિસ્તારોમાં પાણી ભરાઈ જવાને કારણે ઓડિશામાં જનજીવન પર ભારે અસર થઈ છે. વૈતરણિ, સાલંદી, કાણી અને મહાનદી નદી પ્રણાલીના કેટલાક વિસ્તારોમાં શનિવારે પાણીનું સ્તર ઘટી રહ્યું હતું, પરંતુ છેલ્લા 24 કલાક દરમિયાન થયેલા ભારે વરસાદ બાદ તેમાં ઝડપથી વધારો નોંધાયો છે. 

પૂરનાં પાણીના કારણે બાલાસોર, ભદ્રક, કેન્દ્રપાડા અને જાજપુર જિલ્લાના અનેક વિસ્તારો પાણીમાં ગરકાવ થઈ ગયા છે, જેના કારણે ગામડાં, ખેતીની જમીન અને રસ્તાઓ પ્રભાવિત થયા છે. મયૂરભંજ જિલ્લામાં જલકા નદીના ઉપરવાસના જળસંગ્રહ વિસ્તારોમાં ભારે વરસાદને કારણે નદીનું જળસ્તર સતત વધવાને કારણે બાલાસોરના બાસ્તા વિસ્તારમાં પરિસ્થિતિ વધુ ગંભીર બની છે. 

છત્તીસગઢના ઉપરવાસના જળસંગ્રહ વિસ્તારોમાં પણ ભારે વરસાદને કારણે સત્તાવાળાઓને હીરાકુડ બંધના વધારાના દરવાજા ખોલવામાં આવ્યા છે. જળાશયમાંથી પૂરનું પાણી છોડવા માટે હાલમાં 12 જળ નિયંત્રણ દરવાજા ખોલવામાં આવ્યા છે. ભારત હવામાન વિભાગ (IMD)એ આગામી 24 કલાક દરમિયાન ઓડિશાના અનેક ઉત્તર અને પશ્ચિમ જિલ્લાઓમાં ભારે વરસાદની આગાહી કરી છે.