ગુજરાતમાં આજે બનાસકાંઠા તથા ખેડા જિલ્લા પંચાયત તથા 17 તાલુકા પંચાયતની સામાન્ય ચૂંટણી યોજાઈ હતી. સાથે પાંચ જિલ્લા પંચાયત અને 25 તાલુકાના મતદાર મંડળોની પેટા ચૂંટણી પણ થઈ હતી. એકંદરે શાંતિપૂર્ણ મતદાન સંપન્ન થયું હતું.
જૂનાગઢ નજીક વડાલ ગામમાં પુષ્ટિ સંસ્કાર ધામનાં ભૂમિ પૂજનનો ભવ્ય ઉત્સવ ઉજવાયો હતો. મોટી હવેલીનાં ગોસ્વામી કિશોરચંદ્ર મહારાજ અને સહઅધ્યક્ષ પીયૂષ બાવાની પ્રેરણાથી, આગામી પાંચ વર્ષમા આશરે 125 કરોડના ખર્ચે સંસ્કાર ધામનું નિર્માણ થશે, જેમાં ખાસ કરીને બાળકો અને યુવાનોમા ધર્મ અને સંસ્કારનું સિંચન, અને સંસ્કૃત પાઠશાળાના માધ્યમથી દેવ ભાષાનાં પ્રચાર અને પ્રસારનું કામ કરવામા આવશે. આ પ્રસંગે ઉપસ્થિત રહેલ કેન્દ્રીય મંત્રી શ્રી પુરુષોત્તમ રૂપાલાએ જણાવ્યું હતું, કે ભારતીય સંસ્કૃતિનાં જતન અને વિકાસમાં વૈષ્ણવ સંપ્રદાયનું મોટું યોગદાન છે.
ગુજરાતના બીજા મુખ્ય મંત્રી બલવંત રાય મહેતાની આજે જન્મતિથી છે. તેમણે ભારતની સ્વતંત્રતા ચળવળમાં ભાગ લીધો હતો. બળવંતરાય મહેતાનો જન્મ ૧૯ ફેબ્રુઆરી ૧૮૯૯નાં રોજ ભાવનગરમાં થયો હતો. તેઓ બી.એ થયા પછી ગાંધીજીની અસહકારની લડતમાં જોડાયા. ઈ.સ.૧૯૩૦માં ધોલેરાના મીઠા સત્યાગ્રહમાં ભાગ લેવા બદલ બે વર્ષ જેલવાસ પણ ભોગવ્યો હતો. ઈ.સ.૧૯૪૮માં ધારાસભા પદે ચૂંટાયા. સૌરાષ્ટ્ર અલગ રાજ્યની સ્થાપના થતાં તેઓ નાયબ પંત પ્રધાન બન્યા હતા. ઈ.સ.૧૯૫૨માં લોકસભાના સભ્ય તરીકે ચૂંટાયા હતા. તેઓ ૧૯મી સપ્ટેમ્બર૧૯૬૩ના રોજ ગુજરાત રાજ્યના મુખ્યમંત્રી બન્યા. તેઓ ગુજરાતમાં પંચાયતીરાજની સ્થાપના કરી.
ગુજરાતમાં આવેલ ડાંગ જિલ્લો આદિવાસી વસ્તી ધરાવતો જિલ્લો છે. ડાંગ જિલ્લામાં મોટાભાગનો વિસ્તાર જંગલ પ્રદેશમાં આવેલ છે. ગુજરાત સરકારે ડાંગવાસીઓ માટે સ્વચ્છ ભારત મિશન હેઠળ ઘેર ઘેર શૌચાલય બનાવી આપવામાં આવ્યાં છે. સ્વચ્છ ભારત ગ્રામીણ યોજના હેઠળ ડાંગ જિલ્લામાં 10,338 અને મનરેગા યોજના હેઠળ 22,628 શૌચાલયનું કામ પૂર્ણ કરવામાં આવેલ છે. ડાંગના ગ્રામીણ લોકોના ઘેર શૌચાલય બનતાં, સ્વચ્છ ભારત ગ્રામીણ યોજના સાકાર થતી દેખાય છે. લોકો શૌચાલયનો ઉપયોગ કરી સ્વચ્છતા પ્રત્યે જાગૃત થયા છે. તેમજ આંગણવાડી જતા બાળકો પણ સ્વચ્છતા અંગે ધ્યાન આપે તે બાબતે આંગણવાડી કાર્યકરો કાર્ય કરી રહ્યા છે.
સામાજિક કાર્યકર ભાનુભાઈ વણકરના આત્મવિલોપન મુદ્દે, પીડિત પરિવાર અને રાજ્ય સરકાર વચ્ચે ગઈકાલે રાત્રે સમાધાન થયું હતું. સરકારે દુધખા ગામના જે પરિવારની જમીનનો પ્રશ્ન હતો, તે પરિવારને જમીન ફાળવણીનો સૈધ્ધાંતિક સ્વીકાર કર્યો હતો. લાભાર્થીને ત્રણ દિવસમાં મહેસૂલ વિભાગ દ્વારા ફાળવણીનો આદેશ કરાશે. આ ઉપરાંત, સમગ્ર કેસની તપાસ બાબતે પરિવારની માંગણી મુજબ સીટની રચનાનો પણ સરકારે સ્વીકાર કર્યો હતો. ઊંઝા નગરપાલિકા વિસ્તારમાં સ્વર્ગસ્થ ભાનુભાઈની પ્રતિમા મૂકવાની માંગણી બાબતે, સરકાર ઊંઝા નગરપાલિકાને ભલામણ મોકલી અપાશે. સરકાર અને પીડિત પરિવાર વચ્ચે સમાધાન થતાં, પરિવારે સ્વર્ગસ્થ ભાનુભાઈનો મૃતદેહ સ્વીકાર્યો હતો.
ભારતની 7 દિવસની મુલાકાતે આવેલા કેનેડાના પ્રધાનમંત્રી જસ્ટિન ટ્રુડો આજે સવારે સાબરમતી આશ્રમ પહોંચ્યા હતા, અને રાષ્ટ્રપિતા મહાત્મા ગાંધીજીને શ્રધ્ધા સુમન અર્પણ કર્યા હતા. ત્યારબાદ તેઓ ગાંધીનગર અક્ષરધામની મુલાકાતે ગયા હતા. ગાંધીનગરથી પરત ફરીને બપોરે તેઓ આઈઆઈએમ ખાતે વક્તવ્ય આપશે. દરમિયાન ગઈકાલે તેમણે આગ્રાના તાજમહેલની મુલાકાત લીધી હતી. તેમણે વિઝિટર્સ બુકમાં લખ્યું હતું, કે તાજમહેલ એ દુનિયાની સૌથી સુંદર જગ્યામાંથી એક છે.
સ્થાનિક સ્વરાજ્યની ચૂંટણીઓમાં ભાજપ વિજય તરફ આગળ. રાજ્યના 28 જિલ્લાઓની 75 નગરપાલિકાઓની ચૂંટણીમાં આજે જાહેર થયેલા પરિણામોમાં 30 નગરપાલિકાઓમાં ભાજપનો વિજય થયો છે, અને 14 નગરપાલિકામાં તે આગળ ચાલી રહ્યો છે. જ્યારે 27 નગરપાલિકામાં કોંગ્રેસની જીત થઈ છે, અથવા તો તે આગળ છે. ભાજપ રાજકોટ મહાનગરપાલિકામાં વિજયી થયો છે. ભાજપ જ્યાં વિજયી થયો છે તેમાં જસદણ, વિદ્યાનગર, વડનગર, સાણંદ, તળાજા, હળવદ, ખાંટવા, કોડીનાર, લાઠી, જાફરાબાદ, ખેરાળુ, કરમસદ, સોનગઢ, બાવળા, માણસા, દ્વારકા, ગારિયાધાર, ભાણવડ, કુતિયાણા, ચલાલા, ગઢડા, ઈડર, પ્રાંતિજ, જામજોધપુર, ધ્રોળ, છાયા, ભચાઉ, વિજલપોર અને બિલિમોરાનો સમાવેશ થાય છે.
ગુજરાતના છેવાડે આવેલા ,તથા ગુજરાતના ચેરાપૂંજી ગણાતા ,ડાંગની વનરાજી ,સૌ પ્રવાસીઓને આકર્ષે છે ,ત્યારે પ્રવાસીઓને, વધુ સુવિધા મળે તે માટે ,ડાંગ જિલ્લામાં ઉત્તર અને દક્ષિણ વન વિભાગ દ્વારા, કિલાદ, મહાલ અને દેવીમાળની ,કેમ્પ સાઇટનું 50 લાખના ખર્ચે , નવીનીકરણ કરવામાં આવ્યું છે, અને અહીં આવતા પ્રકૃતિ પ્રેમી પ્રવાસીઓ માટે ,રહેવા માટે ,સુવિધાજનક ટેન્ટ ઉભા કરાયા છે. / તેમજ સાહસિક પ્રવાસીઓ માટે ,એડવેન્ચર એક્ટિવીટી પણ, વિકસાવવામાં આવી છે. ડાંગમાં ગુજરાત ઉપરાંત મહારાષ્ટ્ર તેમજ ,ભારતના અન્ય સ્થળેથી ,પ્રવાસીઓ આવતા હોવાથી ,આ સ્થળને પર્યાવરણિય પ્રવાસન સ્થળ તરીકે ,વિકસાવવામાં આવ્યું છે.
ગુજરાતની ૭૫ નગરપાલિકાની ચૂંટણી ૧૭ ફેબ્રુઆરીના રોજ યોજાશે. નગરપાલિકાની ચૂંટણી માટેના પ્રચારના પડઘમ શાંત થઈ ગયા છે. છેલ્લા કલાકોમાં મોરબી સહિતના જિલ્લાઓમાં પવનવેગી ચૂંટણી પ્રચાર કરવામાં આવ્યો હતો. સુરેન્દ્રનગરમાં વિરોધ પક્ષના નેતા પરેશ ધાનાણીએ નગરપાલિકામાં જીતનો વિશ્વાસ વ્યક્ત કર્યો હતો. સૌરાષ્ટ્રમાં આ વખતે ભાજપ સામે હરિફ તરીકે કોંગ્રેસ અને બસપા સહિતના પક્ષો મેદાનમાં છે. ત્યારે જોવું રહ્યું કે મતદાતાઓ કોની પર પસંદગી કળશ ઢોળે છે. ઉલ્લેખનીય છે કે ગત વર્ષે સમરસ બનેલી મોરબીની હળવદ નગરપાલિકા, આ વખતે સમરસ બની શકી નથી. ૧૭ તારીખે મતદાન થયા બાદ ૧૯ ફેબ્રુઆરીના રોજ મતગણતરી હાથ ધરવામાં આવશે.
ગુજરાતના ડાંગ જિલ્લાની સરિતા ગાયકવાડે ઇન્ડોનેશિયામાં ૪૦૦ મીટર રીલે દોડમાં સુવર્ણ ચંદ્રક મેળવીને ગુજરાત તથા ભારતનું ગૌરવ વધાર્યું છે. તારીથ ૧૧થી ૧૪ ફેબ્રુઆરી દરમિયાન ઇન્ડોનેશિયાના જાકાર્તામાં આઠમી એશિયન ગેમ્સ ટેસ્ટ ઇવેન્ટ કોમ્પિટિશનમાં ભારતનું પ્રતિનિધિત્વ કર્યું હતું. ડાંગ જિલ્લાના સરહદી ગામ કરાડી આંબાના શ્રમિક પરિવારની દીકરીએ આ સિદ્ધી પ્રાપ્ત કરતા પરિવાર સહિત ગામમાં ખુશીનો માહોલ છવાયો છે. કુમારી સરિતા ગાયકવાડનો આ પ્રથમ આંતરરાષ્ટ્રીય ગોલ્ડ મેડલ છે રીલે દોડની શ્રેણીમાં સરિતા ગાયકવાડે બેસ્ટ ટાઇમિંગ માટે પણ રેકોર્ડ નોંધાવ્યો છે.
