પાકિસ્તાનના ખૈબર પખ્તૂનખ્વા પ્રાંતમાં કટોકટી લાગુ કરવામાં આવ્યા બાદ પેશાવર સહિતના વિસ્તારોમાં સુરક્ષા વ્યવસ્થા કડક બનાવવામાં આવી છે. પેશાવરના મુખ્ય માર્ગો બંધ રાખવામાં આવ્યા હતા, જ્યારે શાળા, કોલેજો અને યુનિવર્સિટીઓમાં રજા જાહેર કરવામાં આવી હતી. સુરક્ષા પ્રતિબંધોને પગલે સામાન્ય જનજીવન પ્રભાવિત થયું છે અને નાગરિકોને અવરજવરમાં મુશ્કેલીઓનો સામનો કરવો પડ્યો.

ભારતીય નૌકાદળનું જહાજ INS તર્કાશ 11 ઑક્ટોબરના રોજ દક્ષિણ આફ્રિકાના સિમન્સ ટાઉન ખાતે પહોંચ્યું હતું. અહીં ભારતીય નૌકાદળનું જહાજ બ્રાઝિલ અને દક્ષિણ આફ્રિકાના નૌકાદળ સાથે યોજાનારી સંયુક્ત કવાયત IBSAMAR-IXમાં ભાગ લેશે. આ કવાયતનો મુખ્ય ઉદ્દેશ ત્રણેય દેશોનાં નૌકાદળો વચ્ચે સંકલન, કાર્યક્ષમતા અને દરિયાઈ સહયોગને વધુ મજબૂત બનાવવાનો છે.

ભારત-બ્રિટન વચ્ચે અંતરિક્ષ, નાગરિક પરમાણુ ઊર્જા અને AI ક્ષેત્રે સહયોગ વધારવા પર ભાર મૂકાયો... કેન્દ્રીય વિજ્ઞાન અને ટેક્નોલોજી રાજ્યમંત્રી ડૉ. જિતેન્દ્ર સિંહે બ્રિટનના મંત્રી જોનાથન રેનોલ્ડ્સ સાથે દ્વિપક્ષીય બેઠક યોજી હતી. બેઠકમાં સ્મોલ મોડ્યુલર રિએક્ટર, સ્વચ્છ ઊર્જા, સ્ટાર્ટઅપ્સ, આર્ટિફિશિયલ ઇન્ટેલિજન્સ (AI), ક્વોન્ટમ ટેક્નોલોજી અને તબીબી સંશોધન સહિતના મહત્ત્વના વિષયો પર ચર્ચા થઈ હતી.

દિલ્હીમાં વિરોધ પક્ષોના વિરોધ પ્રદર્શનને ધ્યાનમાં રાખીને સુરક્ષા વ્યવસ્થા કડક બનાવવામાં આવી છે. દિલ્હી ટ્રાફિક પોલીસે નાગરિકોને અસરગ્રસ્ત માર્ગો અને આસપાસના વિસ્તારોમાં ટ્રાફિકની સ્થિતિને ધ્યાનમાં રાખીને મુસાફરીનું આયોજન કરવાની સલાહ આપી છે. 

આ દરમિયાન, દિલ્હી પોલીસે વિરોધ પ્રદર્શન અને ધરણા માટે ત્રણ નવા સ્થળો નિયુક્ત કર્યા છે. જેમાં રામલીલા મેદાન, બુરારી મેદાન અને સીબીડી ગ્રાઉન્ડનો સમાવેશ થાય છે. દિલ્હી પોલીસ કમિશનર અનુરાગ કુમાર દ્વારા જાહેર કરાયેલા આદેશ અનુસાર, જંતર મંતરને નિયુક્ત વિરોધ સ્થળોની યાદીમાંથી દૂર કરવામાં આવ્યું છે.